🌸पोवारी कविताये 🌸

 🌸पोवारी कविताये 🌸

मी चली ढुंढन जीवन को सूर्य

सौभाग्यवती बिसरोल् सजी देख

विधवा दुखीमन ही मन पुटपुटाई

अर्धो उमर मा सोडस्यानी गयात

सांगो त मोरी का घोर चुक होती?

जीवित रव्हताना दिनरात तुमला

मी जिगर पर बसायस्यानी जगी

तोरो जायेपर घर समाज न् सांग

मोला काहे मंग वारा पर सोडिस?

तोरो मंघ् मी रुढी को जाल फंसी

मंगल करम कांड लक भयी दूरी

तु रव्हता मी होती घर की लक्ष्मी

सांग आता काहे भई अपसगुनी?

मोला भी लगसे रंगी साड़ी पेहरु 

सोनो चांदी को बिसरो लक नटू

मस्तक पर कुकु भांग भी भरदू

तु जाताच काहे यादभर मन धरु?

मी जिंदा रयकन भी मरन भोगसु

समाज की कुत्सित नजर सोसुसू

सांग अहिल्या, सावित्री, सिंधुताई 

अपमान ल् मिले का मोला मुक्ति?

मी चिरफाडुन रुढी परम्परा ला

जराय टाकुन अंधसरदा-इनला

मी चली ढुंढन सूर्य भगवान ला

अंधारो जीवन मा उजारो करन ला!

       ***********-*

सिखो हरहाल मा जिन

तपन बरसावं से आग 

सिखो आगला सेकनो।

तुफां मचावं से कहर 

सिखो  हवा मा उड़़नो।

ढग त सेतिच बरसनो

सिखो पानीमा भिगनो।

पानी से बन्यो बरफ

सिखो काश्मीर रवनो।

कांटा सेती रस्ता भर

सिखो दुःख ला सहनो।

कदम कदम सेती गोटा

सिखो ठेसलग संभलनो।

तीर चुभे छाती या पाठ

सिखो घाव ला भरनो।

जीवन से खुप मनोहर

सिखो हरहाल मा जिनो।

******

गाव जेवन आबं बी आवं से याद

आम्बा की वा स्वादिष्ट चटनी

आम्बा पन्हा संग भिगी सेवई

आम्बा को रस संगमा घिवारी

आम्बा रायतो की तिखी फोड़ी!

कोहरो की लुस- लुसीत स्याक

सुरन दे मटन को भरपूर स्वाद

दार-बडी़ की से निरालीच बात

खुलं-फोड़ींनको लेयो आस्वाद।

गरम- गरम भात चून को साथ

वोकोपर घीव, सोनो मा सुहाग

बनी होती पाटोडी़ एक दिवस

संग मा वोको होतो आंबा-रस।

कालच खाया भानीभर कन्हुला

रसा मा तरंगता कुरथा का दाना

मन कहे खाव पर पोट ना जागा

उनकी याद से अज भी ताज्जा।

का तेल बड़ा अना का पान बड़ा 

गुपत होता एक पर एक तोंडमा

लाखोरी भाजी मा बोर- कुकसा

चना चनोली पोपट बाल को रसा।

केतरो सांगु गा मी जेवन की मजा

बिह्या पंगतमा व्यंजन सुवारी बड़ा

भटई को स्याक मा परी भर   रसा

गरम भात खावो मोंगरा पर मोंगरा।

------डॉ ज्ञानेश्वर टेंभरें