पोवार समाज को स्वाभिमान ग्राम बिर्सी तिरोडा

 ===========================

पोवार समाज को स्वाभिमान ग्राम बिर्सी तिरोडा

============================

परमश्रद्धेय श्री आदरणीय परमवंदनीय मोरो समस्त सजातीय समाज बांधव इनला सादर प्रणाम जय राजा भोज जय माहामाया गढ़कालिका ,सबला सुचित करनो मा बहुत बहुत ही आनंद होसे की दि १६-०२-२०२२ रोज बुधवार ला माहा राष्ट्र की पावन भूमि ग्राम बिर्सी तालूका तिरोडा जिल्हा गोंदिया मा हर बरस जसो येन् बरस भी बडो धुमधाम लक ३६ कुल क्षत्रिय भोजवंशी पोवार समाज को पोवार समाजोत्थान कार्यक्रम बहुत ही सुन्दर मनभावन आकर्षक भयेव , कार्यक्रम की शुरुआत ग्राम बिर्सी का जेष्ठ नागरिक परमश्रद्धेय श्री बकारामजी राहागंडाले उमर ९५ बरस अना समस्त वयोवृद्ध जेष्ठ नागरिक इनको शुभहस्ते आमरी कुलदेवी माहामाया गढ़कालिका को पुजन , अना कुलश्रेष्ठ ब्रम्हनिष्ठ निष्ठावान परमप्रतापी चक्रवर्ती सम्राट राजा भोज को पुजन , ज्ञान की देवी सरस्वती माय को पुजन , तसोच ग्रामदेवता मातामाय मारुति देवगाय को पुजन करके जय राजा भोज जय माहामाया गढ़कालिका पोवार एकता जिंदाबाद जिंदाबाद को जय घोष लगायकर शोभायात्रा निकाली , शोभायात्रा मा कुलश्रेष्ठ ब्रम्हनिष्ठ निष्ठावान चक्रवर्ती सम्राट राजा भोज को प्रतिमास्वरुप बनावनो मा आयेव होतो , शोभायात्रा मा गाडो बंडी घोडा अना डी जे इत्यादि को समावेश होतो , शोभायात्रा मा उमर को ९५ साल पासुन त ५ साल वरी को जनसमुदाय एकदम पैदल पैदल शोभायात्रा को आनंद लेत लेत चलत होता , शोभायात्रा मा ग्राम बिर्सी को युवा शंखनाद युवती महिला मंडल पुरूष वर्ग सबको बहुत ही महत्वपूर्ण समावेश होतो ,  शोभायात्रा पुरो पुरो बिर्सि गाव फिरता फिरता बरोबर ढाई बजे कार्यक्रम को स्थान पर पहुंची ,

       शोभायात्रा कार्यक्रम को स्थान पर पहुंची वोको बादमा कुलश्रेष्ठ ब्रम्हनिष्ठ निष्ठावान परमप्रतापी चक्रवर्ती सम्राट राजा भोज इनको किरदार निभावने वाला भाऊ इनला सम्मानपूर्वक मंचासिन बसायीन , येन् कार्यक्रम मा प्रमुख उपस्थिति व कार्यक्रम का अध्यक्ष श्री हिरदीलाल नेतरामजी ठाकरे नागपुर वरिष्ठ सल्लागार पोवार समाज एकता मंच व संगठन सचिव अखिल भारतीय क्षत्रिय पोवार/ पंवार माहा संघ ये होता , कार्यक्रम मा सिर्फ अना सिर्फ आपलोच गांव का वयोवृद्ध जेष्ठ नागरिक व वयोवृद्ध जेष्ठ महिला इनको मंच पर बसाय के सम्मानपूर्वक सत्कार करनो मा आयेव , येन् कार्यक्रम को सुत्रसंचालन चि कवलेशजी पारधी इनको कुशल नेतृत्व मा भयेव , कार्यक्रम को प्रास्ताविक श्री आदरणीय अशोक जी इनको कुशल वक्तव्य लक भयेव , आपलो पोवार समाज को स्वाभिमान साती आपलो पोवार समाजमा सामाजिकता एकजूटता प्रामाणिकता सहनशीलता अना सक्रियता को बहुत बहुत महत्वपूर्ण से , आपलो पोवार समाज को वैभवशाली इतिहास व आमरो समाज को पुरातनकाल पासून चलत आयेव गौरवशाली नाव , आमरो पोवार समाजमा आमरी पोवारी संस्कृति व संस्कार घडवणारी आमरी पोवारी मायबोली को संरक्षण करनो आमरी सबकी जिम्मेदारी से , आपलो पोवार समाज को विकास , आपलो गांव अना क्षेत्र को विकास , आपलो राष्ट्र को विकास करन साती आमला सबला संगठीत रवनो पडे असो कार्यक्रम का अध्यक्ष श्री हिरदीलाल नेतरामजी ठाकरे बोलत होता, 

आपलो गाव साती सक्रियता लक कार्यरत रवने वाला आमरा काका माहालपा मामा दादा समस्त ६५ ते ९५ को उमर वाला वयोवृद्ध जेष्ठ नागरिक इनला मंचासिन बसाय कर इनको जो सत्कार करनो मा आयेव येव सिर्फ अना सिर्फ एक गाव बिर्सी की उपलब्धता नही त आपलो पुरो पुरो जनसमुदाय की उपलब्धता सुनिश्चित भयी असा भी महत्त्वपूर्ण कार्यक्रम हर गांव गांव हर शहर शहर मा प्रत्येक समाजमा होयेत पायजे असो श्री हिरदीलाल नेतरामजी ठाकरे बोलत होता , कार्यक्रम को कुशल अना युवा नेतृत्व श्री गुड्डु भाऊ इनन् करीन , कार्यक्रम मा आभार व्यक्त श्री बघेले गुरुजी इनन् करीन , कार्यक्रम मा ग्राम बिर्सी का सर्वजातीय नागरिक उपस्थित होता अना सबन् भव्य माहाप्रसाद को आनंद लेयीन , रात्री ला समाजप्रबोधन साती आमरो पोवारी मायबोली का सुप्रसिद्ध गायक सुप्रसिद्ध किर्तनकार परमश्रद्धेय श्री आदरणीय परमवंदनीय नानीकरामजी टेभंरे माहाराज इनको द्वारा प्रस्तुत पोवारी मायबोली को सुंदर संगीतमय कार्यक्रम भयेव , येन् कार्यक्रम ला सफल अना पोवारीमय बनावन साती प्रत्येक महिला प्रत्येक व्यक्ति प्रत्येक समाजसेवी सामाजिक कार्यकर्ता प्रत्येक युवा शंखनाद इनन् बहुत बहुत सुन्दर कार्य करीन येको साती सबको कोटि कोटि अनंत कोटि अभिनन्दन अना सामने को वाटचाल साती मंगलमय शुभकामना सेती जय राजा भोज जय माहामाया गढ़कालिका सबको कल्याण करें !!

**************************************